【遊記】Day 3 11月19日 日本 期間限定九年庵 川上峽 十可苑


第三日,一早起身都忘記了酒店有免費自助早餐,幸好起身時,早餐時間還未完(9 點之後就無得食啦)。自助餐有好多菜XD,有白飯,咖哩,飯團,肉丸等等,款式不是太多,但作為早餐已經夠啦。

早上食咖哩感覺好heavy XD

之後就去一年得兩次開放時間的九年庵!!!難得撞正開放時間,一定要去!

九年庵開放時間 (2018)

春天:5月上旬(5月3日至5日08:30~16:00)

秋天:11月中旬(11月15日至11月23日08:30~16:00)

去下面官網可以知道最新情況同埋開放日期有無變

官網: http://kanzaki.sagan.jp/kanzakiblog/?page_id=7

搭JR到神崎站,再轉巴士/公車到九年庵,半小時左右就到達仁比山神社仁王門,已經見到好多人了。行到去九年庵門口,嘩……多人到……,又廣東話又國語,排哂隊。行幾步又停下,行幾步又停下。不過九年庵紅葉都算多,補返數XD

係一路行一路停的情況下,影咗好多相,每停一下都會影XD,終於有一張佳作!!!

成個旅程影得最好就係這一張!!要影一張靚相要天時地利配合,我叫朋友去返我影相個位置,光暗改變咗,風景已經變了,不可能有同一個影像。要捕捉靚風景的時間,需要有一定的耐性。

離開九年庵,其實四周還有好多位置可以影相,例如仁比山神社。仁比山神社無禁多人,不需要同其他人逼,舒服好多。雖然無九年庵那麼多紅葉,但是黃黃橙橙又是另外一個風景。滿地落葉,很有秋天氣色啊~~~

回去仁比山神社仁王門,本來是要搭車離去,原來落車位另一邊有一個小巿集,有戲劇睇,有小食,有手信買。又留咗一陣影相先走。

回到神崎站,唔好浪費等車的幾分鐘,係站附近影相。神崎站附近,沒有什麼東西XD

好空曠,有好幾塊大農田,望過去好舒服啊!同之前多人多紅葉形成強烈相比!

九年庵之後,之前計劃要去一個景點—川上峽。要回佐賀站搭巴士/公車去,所以回到佐賀站,站內餐廳食午餐。入咗一間我不記得餐廳名,只記得自己點了炸雞定食。一如以往,日本炸雞好嫩,又有肉汁,香港同佢比差十萬九丈遠!

之後搭巴士/公車,其實已經兩點幾,都有想過不去這個景點,因為乘車時間要三十分鐘,到了川上峽影相時間都不多。不過諗唔到有什麼地方可以去,唔理啦,照去!

要搭往古湯 北山線的巴士/公車,上車時得我同朋友兩個人,我心諗會唔會上錯車!?巴士/公車一路行,經過好多車站,但完全無人上車?!全程得我同我朋友兩個?!心諗無理由,巴士/公車終點站是一個温泉區,應該會有人去,為何只有我同朋友兩個?!到了目的地車站—川上橋,直到落車都只有我同朋友兩個人。其實川上橋附近好多車經過,但是一個人都無XD紅葉又不多,心諗去錯景點了?!

我同朋友都唔死心要四周圍行,期望有靚風景出現。之後到了—十可苑,因為門口有一棵好大的紅葉樹就入去了。即刻上網查十可苑,原來都是賞楓的位置,但是網上照片不多,IG都唔多相,還要付入場費,都嚟到入去看下,或者有驚喜。

一買票職提醒,5點關門,當時已經3時45分了=.=

一入去,痴線,好多紅葉啊!!!!!!個風景靚過太宰府,御船山樂園等等,還有一條小瀑布。越行越入,越行越上,越行越多楓葉,黃黃紅紅,個感覺好正!!!!

重點無人!!!!!留了一個小時多,只看見五個遊人,計埋我同朋友,得七個人!!!我諗因為交通不太方便,所以沒有太多人,但風景就一流。朋友在小瀑布影相,影到唔捨得走XD。又正正日落時間,陽光照射到又紅又綠又黃的樹海內,好靚啊!

我同朋友都係最想看見這類風景,多於人山人海的熱鬧景點。奈何時間到了閉館時間,要走了,好可惜,如果大家有機會一定要去—十可苑!!!!

相關網站 https://www.sagabai.com/main/119.html?cont=kanko&fid=55

之後乘車回佐賀巿,回程班次終於有多少少乘客了,加上我同朋友,車上有5個乘客XD

回酒店,取回行李,真係要搭新幹線去熊本了。


去酒店check in 再出嚟,已經七點幾了。酒店在熊本站附近,我非常好奇酒店附近其實好寧靜,我以為會好熱鬧……要找晚餐都要搭電車去花畑町附近的銀座通

銀座通其實有好多東西可以食,刺生、燒肉、甜品、壽司等等,不過行極都揀唔到心水XD 最後朋友又google 揾到有一間又有人推介的壽司店-- 相撲寿司大砲部屋。

這間店得bar 枱,同一般連鎖式壽司店或餐廳唔同,類似居酒屋。坐位前有一個置位放壽司或者其他食物,未必有碟,要視付你食乜嘢。一般單點壽司都係直接放在坐位前的置位。壽司拼盤會有碟,我叫咗條燒魚都有碟。

一入去全日文,死啦,我最多聽得懂一些日文單字XD,好彩有個講普通話的店員(我諗叫徒弟適合D) 招呼。一般都直接叫企中間的壽司師父落單,但唔識日文會有一個中文加日文拼音對照表,可以寫在白紙上然後交比壽司師父落單。我覺得整個落單形式好奇怪……不過無辦法,不懂日文,唯有係禁。

講食物質素,又未去到十分好,不過海膽壽司就真的好好食。唔識形容,不過平時香港食海膽壽司味道好淡,這間味道非常濃,同平時食的海膽好唔同,我落單的壽司中最好食就係海膽壽司。其他魚類壽司,不過不失。


無論食物質素如何,食客都好開心。食客主要享受同壽司師父同徒弟聊天多於食,好似屋台一樣,係食氣氛的地方。有無好東西食都無所謂,最重要係可以有人同佢哋吹水,睇得出職員同食客都好開心。如果大家識日文,可以同其他食客同職員吹水,會比單單係壽司更開心XD


IG: www.instagram.com/timson626

Website: https://www.timson-travel.com/

Facebook: https://www.facebook.com/timsontravel/

#Japan #日本 #佐賀 #神崎 #九年庵 #仁比山神社 #佐賀 #十可苑 #紅葉 #川上峽 #川上橋 #熊本 #相撲寿司大砲部屋 #氣氛


第三日行程

東橫INN-->九年庵-->川上峽-->去熊本-->住熊本新酒店-->相撲寿司大砲部屋-->住熊本新酒店

https://drive.google.com/open?id=1ugD0GN2jKPNzuDiBjfB4G0jNpBz9z2ny&usp=sharing

  • White Facebook Icon

Facebook

  • White Instagram Icon

Instagram

About Me

自從2015年的一次獨遊,感受到世界很大,世界各地都有著不同的人,不同的故事,不同的風景。反思畢業後只記掛工作,每日都埋頭苦幹到晚上或者凌晨,失去了人生。

 

Read More

 

Subscribe Me!
  • White Facebook Icon

© 2018 Proudly created by Timson