【遊記】20180617 同我去新加坡hea下 濱海灣花園日與夜


第二日,尋夜訓覺,訓下醒下,成身出哂汗……之後會出住宿體驗再講。

一起身早餐都唔食就去咗新加坡熱門到爆的景點----魚尾獅。為咗唔好禁多人我諗住早D去,去到九點幾都係好多大陸人……

真係多人到影咗兩張相就走啦!係附近有間小café有早餐食,叫咗傳統kaya toast + 加蛋。都係嗰句,唔係出名店但係都好好食啊,大家去完魚尾獅都可以去試下。

不過我想講,係我食緊嘢嗰陣有兩個講國語的人士坐埋同一張桌,張桌禁大又無理由我一個人坐哂啦,你咪坐囉。佢哋一坐,好嘈,真係好嘈。唔係講粗口都好嘈。其他位都無人禁大聲講嘢,但係佢哋就好大聲,好辛苦,我同佢哋只係唔夠一米距離,D聲好應!我食咗一塊kaya toast,已經頂唔到,自己搬咗位了。佢哋好似當正自己屋企禁,完全唔尊重其他人。


算了,我食完就走啦。搭地鐵去gardern by the bay。其實gardern by the bay 好大。除咗好出名的擎天樹叢,行過去仲有好多自然風景睇,呢個位就好好多,無乜人,因為下午係無乜人嚟嫁@@

到比咗錢上去行下空中步道,空氣好好,可以望到gardern 邊緣,其實晚上嚟睇會更靚,會有好多燈飾睇,所以我晚上會再嚟!

再行入D就到咗flower dome 同forest dome 啦!我係香港kkday 網買咗門票 HK125,唔洗排隊就攞到飛啦!


先去睇forest dome,一入去就覺得好涼爽啊!有條細瀑布,係瀑布人都會濕哂!一路行入去都有好多樹木圍住你,係新加坡估唔到有呢類型的景點。

之後再去埋flower dome,老實說,花唔多,反之唔係重點。好多不同造型的擺設我覺得仲好睇,但係花唔係話開得好誇張。


一出嚟,食返杯雪糕先啦!太熱啦!無香港D雪糕禁甜,感覺唔係一啖啖糖食入口,都幾好!

時間只係中午,等我去埋聖淘沙行下先。到harbourfront station,先去food court 食個lunch 先。好多人啊,差D揾唔到位。叫咗炒棵條,但係商場炒棵條同係熟食中心嗰D比,都係差D鑊氣。

再轉聖淘沙鐵路。不過真係好多人搭鐵路去,多人到人都未上哂車就關門,夾到好多人啊……

搭到尾站,最近沙灘的一個站。我最想去沙灘,係沙灘邊吹著海風走,好舒服啊!不過天氣真係好熱,我又買雪糕食。老實講,雪糕係成個trip 最貴的食物,兩球差唔多9塊新加坡幣。一路食雪糕,一路行海邊 @@

走嗰陣仲精彩,排哂長龍,等咗五六轉鐵路先上到車。途中想轉返出去搭巴士不過太多人出唔到去……

返到去harbourfront station要去超巿買返條短褲先,真係太熱,長褲熱死啦。老實講,我都係撞下彩,睇超巿有無,點知真係有,仲有埋試身室比你@@

之後返咗去china town 的hostel 休息同換褲……之後就到食飯時間!行咗去Maxwell food centre,一定要試海南雞飯啊!可借天天海南無開,所以就食咗都好多人排的阿仔海南雞飯。真係好食啊!食雞有雞味!隻雞食到入口仲有陣香味!D雞好滑,肉嫩,好多肉,有肉汁!唔洗點任何醬汁都好好食。

不過海南雞飯份量唔係話好大,攪到我都仲未飽,返牛車水食叻沙先。好重的椰奶味,反之辣味無禁重,不過禁重好,一味得辣味反之唔好食。

食完晚飯都只係八點左右,我就想去多一次gardern by the bay。晚上同早上的景差好遠,晚上去靚好多,好彩有再嚟多次影相。晚上去擎天樹叢開哂燈,D燈仲會不停變色。由於成個gardern同高樓大廈都有距離,城巿光污染之下,令燈色更加靚。

真係好累要返hostel 訓了!

(仲有好彩有買tourist pass唔係好似我禁搭車,交通費都幾誇張)

行程分享

https://drive.google.com/open?id=1SDjMlppaTbJdKSHY7z8CLwoMcAWdoYSr&usp=sharing

  • White Facebook Icon

Facebook

  • White Instagram Icon

Instagram

About Me

自從2015年的一次獨遊,感受到世界很大,世界各地都有著不同的人,不同的故事,不同的風景。反思畢業後只記掛工作,每日都埋頭苦幹到晚上或者凌晨,失去了人生。

 

Read More

 

Subscribe Me!
  • White Facebook Icon

© 2018 Proudly created by Timson