【遊記】20180618 同我去新加坡hea下 旅行要去行山啊!!


一起身就準備要轉hostel 啦。本身就諗住住唔同的地方,唔好住死一個位置。

不過起身都要去食一食早餐先,係最近的牛車水大廈食啦。

食咗香菇肉脞麵,只有少量的香菇,肉就唔少,有一舊應該係炸雲吞,有醬比你撈麵食。呢個麵普普通通啦,無乜嘢值得好講,不過份量太細啦,都要食多D嘢先得。

行過隔離見到有粽,本身想食嫁,因為呢日就係端午節啦,但係賣哂LU……。好早啊未夠九點賣哂,所以轉咗食碗粥算了。

花生魷魚粥,魷魚有兩舊@@,花生好多,個粥望落去好多油,不過食落肚都好味喎,粥加上比較重的油香味,感覺好特別。得舊魷魚就真係太少啦!

食完諗住走,但係見到一間好多人排隊,係賣油鴨飯,唔通好出名!?不過我唔鐘意食鴨,所以無試LU。


之後返去hostel 整理好行李,準備去第二間hostel 了,RedDoorz Hostel。間hostel係小印度區,由china town 站搭去jalan besar 站,都係五分鐘路。不過太早到啦,同check in 時間都差成一小時,禁等下先啦,反正落雨都無得出去行。間旅店行入去的感覺唔太差,好過china town 嗰間,之後再講。

到check in 時間,要行四層樓先上到房,一入去放下背包又出去。午餐時間,又食@@ 係附近的熟食中心是但食咗個蝦麵,都係好普通,唔特別講啦。

今日行程係想行下山,Mount Faber Park 花柏山公園。落完雨個天都好多雲,都有諗過唔去,不過明天行程全部同今日調轉又唔夠時間,所以都係行啦。


再一次去到harbourfront station,不過今次唔係入聖淘沙,係搭cable car 上花柏山。心諗早知尋日去聖淘沙搭埋上去花柏山啦,好似底少少,但係尋嗰天氣……都係今日行好少少。

上到去天氣都唔係好差,唔算好好太陽,天陰陰,好彩無雨揸。由個站行去第一個point ,faber point,路程唔長十五分鐘內就到了。上面都有隻魚尾獅(好細隻) 比你影相,同睇下新加坡景觀,如果晚上嚟睇都應該唔差的。之後行到henderson waves,是新加坡最高的人行橋。用上波浪設計,奇思妙想的設計同周圍的樹森組合出令人意想不到的效果,都係一個好適合跑步的地方啊!好舒服啊!

之後再行到去forest walk,係樹木中串插的一條步道,同大自然零距離,好舒b服啊。不過行咗好耐,有D累,要返轉頭啦……記得係cable car 站附近敲下bell of happiness啊!之後搭cable car 落山LU。去返harbourfront station商場food court,行完真心餓,食嘢啦!我叫咗黑白炒粿頭,相比起炒粿條,炒粿條好食D,炒粿頭好粉,口感唔太好,但係味道OK,都係嗰句,無鑊氣啊!算啦,好又一餐唔好又一餐!

之後有諗過去,之後去返singapore flyer 上去摩天輪,之後我搭車去到,覺得真係好貴……所以到最後唔上去lu。之後選擇咗去克拉碼頭 Clarke quay,如果一行幾個人,嚟呢度食晚飯氣氛係幾好。我嚟都只係想感受下佢哋夜巿的氣氛都影下相。呢個地方都幾似香港灣仔海仔傍,有好多酒吧,餐廳,不過人就少香港好多,真係可以嚟同朋友吹下水。

今日行程完結。聽日去邊?


行程大概位置

https://drive.google.com/open?id=1SDjMlppaTbJdKSHY7z8CLwoMcAWdoYSr&usp=sharing


  • White Facebook Icon

Facebook

  • White Instagram Icon

Instagram

About Me

自從2015年的一次獨遊,感受到世界很大,世界各地都有著不同的人,不同的故事,不同的風景。反思畢業後只記掛工作,每日都埋頭苦幹到晚上或者凌晨,失去了人生。

 

Read More

 

Subscribe Me!
  • White Facebook Icon

© 2018 Proudly created by Timson